教育部規畫逐年的3月佮8月會辦2擺的臺灣台語認證考試。114年3月的考試會考A、B、C三卷。總是，8月的考試就干焦考A、B兩卷。著特別提醒考生的是，明年8月的考試，咱的B卷頭一擺欲改做「電腦化測驗」（其中書寫測驗原在用紙筆作答）。

　　教育部114年3月的臺灣台語認證考試，報名時間對113年10月21早起9點開始，到11月15下晡5點，無限定身份，凡若有興趣的人，攏會當佇線頂報名。報名費250箍，若19歲以下的咱猶會特別優待免抾錢。測驗所有的項目（聽、講、讀、寫4項）若攏考有齊著的，就通提著1份紀念品。114年3月的考試簡章佮明年度這2擺考試的重要日程表攏有公佈佇認證考試的網站囉，明年8月的簡章，時到阮會閣另外佇認證的官方網站，貼告示報咱逐家知。

　　114年3月這場的考試會分三卷、做兩工辦。3月初1（拜六）先考A卷；3月初2（禮拜）才考B佮C卷。因為114年8月咱就會辦「B卷」的電腦化測驗，所以欲考B卷的考生，看是欲揀3月這場考傳統式的，用紙筆作答，抑是欲揀8月這場電腦化測驗，請逐家著先想予定著。教育部這馬都也共電腦化測驗的線頂模擬平台攢好勢矣，嘛有公佈佇認證考試網站的「自學資源」專區，歡迎考生才較捷來試用看覓咧，看有合咱用無，嘛通冗早適應。

　　有關這2場考試的相關資訊，咱攏有齊共刊佇咱認證考試的網站（https://ttg.moe.edu.tw）矣，敬請參考。若猶有其他考試相關的問題，才請聯絡承辦單位國立臺灣師範大學。電話服務專線：0800-699-566抑是(02)7749-3664；嘛有服務信箱：ttg.sce@deps.ntnu.edu.tw。